ദോഹ: രാജ്യത്തിന്റെ സാമ്പത്തിക അടിത്തറ ശക്തമാക്കുന്നതിനും സാങ്കേതിക വിദ്യയിലും നൂതന സംരംഭങ്ങളിലും ആഗോള പ്രതിഭകളെ ആകർഷിക്കുന്നതിനുമായി ഖത്തർ രണ്ട് പുതിയ റെസിഡൻസി വിസകൾ അവതരിപ്പിച്ചു. സംരംഭകർക്കും (Entrepreneurs) ഉന്നത ഉദ്യോഗസ്ഥർക്കും (Senior Executives) വേണ്ടിയുള്ള ഈ വിസ പദ്ധതികൾ ദോഹയിൽ നടക്കുന്ന 'വെബ് സമ്മിറ്റ് ഖത്തർ 2026'-ന്റെ ഭാഗമായാണ് പ്രഖ്യാപിച്ചത്.
 സംരംഭകർക്കുള്ള റെസിഡൻസി (Residency Visa for Entrepreneurs)
പുതിയ സ്റ്റാർട്ടപ്പുകൾ തുടങ്ങാനോ നിലവിലുള്ള ബിസിനസ് വിപുലീകരിക്കാനോ ആഗ്രഹിക്കുന്നവർക്കുള്ളതാണ് ഈ വിസ.
​ 5 വർഷം വരെ കാലാവധിയുള്ള, സ്വയം സ്പോൺസർ ചെയ്യാവുന്ന (Self-sponsored) വിസയാണിത്. ഇത് പിന്നീട് പുതുക്കാനും സാധിക്കും.
 ഖത്തറിലെ ബിസിനസ് ഇൻകുബേറ്ററുകളുടെയും ആക്സിലറേറ്ററുകളുടെയും സഹായം ലഭിക്കും. ബിസിനസ് തുടങ്ങുന്നതിനും  ചിലവുകൾ കുറയ്ക്കാൻ സഹായിക്കുന്ന പങ്കാളിത്ത ശൃംഖലകളുടെ സേവനവും ഇതിലുണ്ടാകും.
ഉന്നത ഉദ്യോഗസ്ഥർക്കുള്ള റെസിഡൻസി (Residency Visa for Executives)
സ്വകാര്യ മേഖലയിലെ വളർച്ചയ്ക്ക് നേതൃത്വം നൽകുന്ന ഉന്നത പ്രൊഫഷണലുകളെ ലക്ഷ്യമിട്ടാണിത്.
​കമ്പനികൾ ശുപാർശ ചെയ്യുന്ന മുതിർന്ന ഉദ്യോഗസ്ഥർക്ക് ലളിതമായ നടപടിക്രമങ്ങളിലൂടെ ദീർഘകാല താമസാനുമതി ഉറപ്പാക്കാം.
​രാജ്യത്തെ പ്രധാന മേഖലകളിൽ ശക്തമായ നേതൃനിരയെ വളർത്തിയെടുക്കുകയും ബിസിനസ് തുടർച്ച ഉറപ്പാക്കുകയും ചെയ്യുക എന്നതാണ് ഇതിന്റെ ലക്ഷ്യം.
ഈ രണ്ട് വിസകളും ലഭിക്കുന്നവർക്ക് സ്പോൺസറുടെ ആവശ്യമില്ലാതെ ഖത്തറിൽ താമസിക്കാനും കുടുംബത്തെയും വീട്ടുജോലിക്കാരെയും കൊണ്ടുവരാനും അനുമതിയുണ്ടാകും. കൂടാതെ ലൈസൻസിംഗും മറ്റ് ഔദ്യോഗിക നടപടിക്രമങ്ങളും ലളിതമാക്കുന്നതിനുള്ള മുൻഗണനാ സേവനങ്ങളും ഇവർക്ക് ലഭിക്കും.
​ഖത്തർ നാഷണൽ വിഷൻ 2030-ന്റെ ഭാഗമായി വിജ്ഞാനാധിഷ്ഠിത സമ്പദ്‌വ്യവസ്ഥ കെട്ടിപ്പടുക്കുന്നതിൽ ഈ പദ്ധതി നിർണ്ണായകമാകുമെന്ന് ഇൻവെസ്റ്റ് ഖത്തർ സിഇഒ ഷെയ്ഖ് അലി ബിൻ അൽവലീദ് അൽതാനി വ്യക്തമാക്കി.